کس قدر خوش نصیب ہوتے ہیں

غزل 

کس قدر خوش نصیب ہوتے ہیں
جو شریف و نجیب ہوتے ہیں

کیا نہیں ہوتے قابل_ عزت؟
دہر میں جو غریب ہوتے ہیں

بے خرد دوستوں سے تو بہتر
ہاں رقیب_ لبیب ہوتے ہیں

در پہ اب سائلوں کی دستک سے
صد پریشاں مجیب ہوتے ہیں

جان لیتے ہیں جو مریضوں کی
کیا وہ قاتل طبیب ہوتے ہیں؟

کیوں محبت کی راہ میں ہی سدا؟
غم ہی پیہم نصیب ہوتے ہیں۔۔۔۔

لوگ بس ان کو تکتے رہتے ہیں
ظاہرا جو شبیب ہوتے ہیں

سرفرازی انہیں کو ملتی ہے
وہ جواہل_ شکیب ہوتے ہیں

دور رہ کر بھی ظاہرا کچھ لوگ
دل کے بے حد قریب ہوتے ہیں

گلستان_ ادب میں اے نوری
نغمہ خواں بس ادیب ہوتے ہیں

محمد ابراہیم نوری

 

جو زندگی میں کبھی جستجو نہیں کرتا

غزل 2

جو زندگی میں کبھی جستجو نہیں کرتا
میرا خدا بھی اسے سرخ رو نہیں کرتا

یہ میرا دل تو دھڑکتا ہے ظاہرا لیکن۔۔۔۔۔
کسی بھی شے کی یہ دل آرزو نہیں کرتا

کسی کے قرب نے مجھ کو بنا دیا شاعر
وگرنہ شاعری میں تو کبھو نہیں کرتا

کسی نے دیکھ لیا تو کہے گا دیوانہ
جو اپنا چاک گریباں رفو نہیں کرتا

جو جیسا ہے اسے ویسا ہی یہ دکھاتا ہے
یہ آئینہ تو کبھی بھی غلو نہیں کرتا

میں ایسے شخص کی آنکھوں کو پاک سمجھوں گا
نظر جو سوئے زن_ خوب رو نہیں کرتا۔۔۔۔۔۔۔۔۔۔

فقیر ہوں تیرے در کا تجھے صدا دی ہے
اے جان جاں میں صدا کو بہ کو نہیں کرتا

وہ جس نے بیچ کے زیور تجھے پڑھایا تھا
عجب ہے فون تک اس ماں کو تو نہیں کرتا

ہمارا عشق ابھی حال احتضار میں ہے
تو پھر اسے کوئی کیوں قبلہ رو نہیں کرتا

مہک رہی ہیں فضائیں گلوں کی خوشبو سے
چمن میں رہ کے تو احساس بو نہیں کرتا؟

زمین شعر ہو بنجر تو اس زمیں پہ کبھی
درخت شعر و سخن کا نمو نہیں کرتا

کتاب عشق کو چھونے کے واسطے نوری
وضو ضروری ہے تو کیوں وضو نہیں کرتا

کلام محمد ابراہیم نوری

جسکی خاطر سجائی محفل ہے

غزل

 

جسکی خاطر سجائی محفل ہے

کیوں رسائی اسی کی مشکل ہے؟

 

زندگی کیا ہے؟ میں بتاتا ہوں

ایک مجموعہء مسائل ہے۔۔۔۔۔

 

اسکو بھی تو سزا ملے کوئی

جو میری خواہشوں کا قاتل ہے

 

پہلے وہ مجھ پہ جاں چھڑکتا تھا

اب میرے دشمنوں میں شامل ہے

 

دست قاتل بھلا نہ کیوں لرزیں

تیر کا رخ جو سوئے بسمل ہے

 

رہتی دنیا تلک یہ کربوبلا

حق و باطل میں حد فاصل ہے

 

ہونے والا ہے کچھ برا شاید

آج کل مضطرب میرا دل ہے

 

باپ بولا ادا کروں کیسے

اس قدر پانی گیس کا بل ہے

 

وہ فصیل انا گرانی ہے

جو ہمارے میان حائل ہے

 

ایک دن غم تو ایک روز خوشی

بس یہی زندگی کا حاصل ہے

 

آج کے دور میں جسے دیکھو

مقصد زندگی سے غافل ہے

 

کیسے کھاتے ہو شوق سے نوری

خالی فلفل سے یہ فلافل ہے(1)

 

(1)فلفل فارسی میں مرچ کو کہتے ہیں

اور فلافل برگر وغیرہ کو

نظم

 

 

نظم معری 

 

 دشت بے آب سے ہم جب بھی گزرتے ہیں

کبھی۔۔۔۔

 

یاد اک تشنہ دہن شخص بہت آتا ہے۔۔۔۔۔۔۔۔۔۔۔

۔۔۔۔۔۔۔۔۔۔۔۔۔

اور آنکھوں میں سوا اشک ابھر آتے ہیں۔۔۔۔۔۔۔

 

یاد کرتے ہیں اسی شخص کے تشنہ لب کو۔۔۔

جس کو انسان نما جانوروں نے لوگو ۔۔۔۔۔۔۔۔۔

یعنی سفاک زمانہ نے ستم پیشوں نے۔۔۔۔۔۔۔۔۔

 

 

 حالت تشنہ لبی میں  لب دریا دیکھو

 پیکر و سر کے میاں ہائے جدائی ڈالی

اسی مظلوم کی الفت میں زمانے والو

 

اپنا رخسار سر ریگ تپان صحرا

رکھ کے کچھ دیر اسے یاد کیا کرتے ہیں

 

دشت بے آب سے ہم جب بھی گزرتے ہیں کبھی

یاد اک تشنہ دہن شخص کی آجاتی ہے 

اور آنکھوں میں سوا اشک ابھر آتے ہیں۔۔۔۔۔۔

۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔۔۔۔۔۔۔۔۔

 

 

 

غزل 15

 

غزل

میرے گلے میں کوئی بات کیوں اٹکتی ہے۔۔۔۔۔۔

کسی کی چشم غضب مجھکو جب بھی تکتی ہے

 

 دکھائی دیتی ہے وہ اور بھی حسین و جمیل

کہ اس کے سر سے ردا خود سے جب سرکتی ہے

 

اسی امید پہ میں جی رہا ہوں آج تلک۔۔۔۔۔۔۔

کہ ایک دن میری قسمت بدل بھی سکتی ہے

 

جو کر ریے ہیں خوشامد زبان سے ہردم

پہ دل میں آتش نفرت بہت لپکتی ہے

 

ہو گر خلوص پہ مبنی محبتوں کا سفر

تو اسمیں جسم ہے  تھکتا  نہ روح تھکتی ہے

 

سبھی ہیں مہر بہ لب مرد کے بھٹکنے پر

تو شور کیسا اک عورت ذرا بھٹکتی ہے؟

 

سمیٹو زاد سفر کچھ تو آخرت کے لئے۔۔۔۔۔۔۔

تمہاری سانس کسی وقت رک بھی سکتی ہے

 

سکون قلب کی دولت تجھے ملے کیونکر

حسد کی آگ تیرے دل میں گر بھڑکتی ہے

 

اسی سے آج بھی سب دور ہونے لگتے ہیں

کسی سے تھوڑی سی غربت اگر چپکتی ہے

 

ضرور ہوتا ہے پیاسے کو آب کا دھوکہ

ذرا بھی ریتی اگر دشت میں چمکتی ہے

 

وہاں تو آیئنگے پتھر ضرور اے لوگو

کسی شجر پہ جہاں  فصل تازہ پکتی ہے

 

اگر نہیں ہوا دیدار یار اے نوری

تمھاری آنکھوں سے پھرکیوں خوشی چھلکتی ہے