چلو غدیر چلو

غدیری منقبت

 

بپا ہے جشن_ ولایت، چلو غدیر چلو

اگر علی سے ہے الفت، چلو غدیر چلو

 

کھلا ہوا ہے یہاں مے کدہ ولایت کا

برائے جام_ولایت، چلو غدیر چلو

 

بنے گا منبر_ پالان خم کے میداں میں

یہی ہے رب کی مشیت، چلو غدیر چلو

 

ہیں منکران_ ولائے علی وہاں موجود

جلانے انکی طبیعت، چلو غدیر چلو

 

لگایا نعرہء بخ غدیر میں کس نے؟

کھلے گی یہ بھی حقیقت، چلو غدیر چلو

 

علی خلیفہء برحق ہیں بعد_ ختم_ رسل

دلیل کی ہے جو حاجت، چلو غدیر چلو

 

ہر ایک پا نہیں سکتا ولایت_ حیدر

اگر ہےدل میں طہارت، چلو غدیر چلو

 

اگر ہو دیکھنا انجام_ منکر_ مولا

حجر سے ہوگی ہلاکت، چلو غدیر چلو

 

بنا ولائے علی سب عبادتیں ہیں عبث

قبول ہوگی عبادت، چلو غدیر چلو

 

کبھی نہ آئے گی نوبت قیاس کی نوری

 نبی سے لینے ہدایت، چلو غدیر چلو

 

کلام محمد ابراہیم نوری