Monday, 11 April 2022، 01:36 AM
مہ صیام
مہ صیام
رہتا نہیں ہے صرف لبوں پر۔۔ مہ صیام
ہے متقی کے قلب کے اندر مہ۔۔ صیام
ماہ نزول مصحف داور۔۔ مہ صیام
وجہ رضائے خالق اکبر۔۔ مہ صیام
ظاہر یہ بات خطبہء شعبانیہ سے ہے
ہر ماہ سے ہے افضل و برتر۔۔ مہ صیام
ہوگا اسی میں غرق ہر اک لشکر گناہ
ہے رب کی رحمتوں کا سمندر۔۔ مہ صیام
پیدائش امام حسن سے زہے نصیب
چمکا ہے خوب تیرا مقدر۔۔ مہ صیام
مایوسیت کو چھوڑ دے بیمار معصیت
بخشش کا مغفرت کا ہے مصدر۔۔ مہ صیام
حیدر کے نور عین نے، زہرا کے چاند نے
تجھ کو کیا ہے اور منور۔۔ مہ صیام
کربل سے ربط بڑھتا ہے میرا ترے طفیل
آتے ہیں یاد مجھ کو بہتر۷۲۔۔ مہ صیام
محشر کی تیز دھوپ سے خائف نہیں ہوں میں
سایہ فگن ہے نوری کے سر پر۔۔ مہ صیام
محمد ابراہیم نوری
5 رمضان المبارک 1443
رات 1بجے قم حرم حضرت معصومہ س
22/04/11