غزل 11

غزل

 

خدا کا نام لئے گھر سے جو نکلتے ہیں..

تو مشکلات کے طوفان خود ہی ٹلتے ہیں...

 

نشانِ منزلِ مقصود پا نہیں سکتے

ہر ایک گام پہ جو راستہ بدلتے ہیں.... 

 

یہ شہرِ امن تھا پہلے،ہے اب یہ شہرِ ستم...

سو خوفِ ظلم سے سب گھر سے کم نکلتے  ہیں..

 

غریبِ شہر کا پرسانِ حال کوئی نہیں

امیرِ شہر سے مِلنے کو سب مچلتے ہیں...

 

فلاح و فوز کی دولت اُنہیں کو ملتی ہے....

جو اپنی خواہشِ نفسی کا سر کُچلتے ہیں...

 

جو سر فرازئ  یاراں سے خوش نہیں ہوتے...

سدا وہ آتشِ بغض و حسد میں جلتے ہیں..

 

وہ گویا اپنی حقیقت کو بھول بیٹھےہیں......

تکبُّرانہ چلن سے جو راہ چلتے ہیں....

 

اسی کا نام ہے مرقوم صفحہء دل پر..

وہ جس کے نام سے گِر تے ہوئے سنبھلتے ہیں .....

 

جو کل نہ جان سکے تھے شباب کی قیمت....

  یہ پِیر، کیوں کفِ افسوس آج  ملتے ہیں ...؟

 

زمانہ آگیا پھر ظلم و بربریت کا

ستمگراں سرِ مظلوم پھر کُچلتے ہیں...

  

دیارِ دانش و بینش میں ہے قیام میرا ...

جہاں علوم کے چشمے بہت اُبلتے ہیں ....(1 )

 

ہے مال و زن میں وہ طاقت کہ جس کے زیرِ اثر...

بڑے بڑوں کے قدم ایک دم پھسلتے ہیں 

 

عجب اثر ہے اے نوری زبانِ الفت میں

مثالِ موم ،بڑے سنگدل پگھلتے ہیں...

 

کلام:محمد ابراہیم نوری

 

(1)قم المقدس کی طرف اشارہ ہے

    

غزل 10

تازہ غزل

 

ایک دہلیز پہ پیشانی جھکا رکھی ہے

آبرو اپنی زمانے میں بچا رکھی ہے........

 

حق و باطل کے میاں فیصلہ آساں ہوگا

جس نے بھی پیش نظر کربوبلا رکھی ہے

 

شہر یہ شہر خموشاں کی طرح کیوں ہے خموش

کیا تکلم  پہ بھی پابندی لگا رکھی ہے۔۔۔۔۔۔

 

اپنی شہرت پہ نہ اترا اے طبیب ناداں۔۔۔۔

ترے ہاتھوں میں خدا ہی نے شفا رکھی ہے

 

صرف صحرا کا تصور ہی کیا تھامیں نے 

اس تصور نے مری پیاس بڑھا رکھی ہے

 

اب تو چہرے بھی میں پڑھ پڑھ کے بتا سکتا ہوں

تیغ داماں تلے, کس کس نے چھپا رکھی ہے

 

لب پہ دریا کے  ہوا تیز چلا کرتی ہے.....

شمع ساحل پہ یہ پھر کس نے جلا رکھی ہے

 

اب امیروں کا ارادہ ہے اجاڑیں اسکو

ایک بستی جو غریبوں نے بسا رکھی ہے

 

ہر بہو کا یہ گلہ شکوہ بجا ہے کہ نہیں؟

آگ ہر ساس نے ہر گھر میں لگا رکھی ہے

 

باپ کا سایہ ابھی سر پہ ترے قائم ہے

شکل کیوں تو نے یتمیوں سی بنا رکھی ہے

 

تیرے ہر قول و عمل میں ہے تصادم واعظ

سر پہ پھر کس لئے دستار سجا رکھی ہے؟

 

رابطہ توڑ بھی سکتا نہیں اس سے نوری

مصلحت پر جو تعلق کی بنا رکھی ہے

متاع عشق و محبت تو پاس ہے پھر بھی

 

 

 

 

تازہ غزل

 

متاع عشق و محبت تو پاس ہے پھر بھی

نہ جانے کیوں یہ میرا دل اداس ہے پھر بھی

 

یمارے عہد میں یہ حال صنف نسواں ہے

لباس جسم پہ ہے، بے لباس ہے پھر بھی

 

نہ جانے کس لئے ہے مبتلائے کار_ جنوں

وہ شخص صاحب_ ہوش و حواس ہے پھر بھی

 

گھلا ہے اس کے سخن میں تو زہر نفرت کا

پہ اسکو حرف محبت کا پاس ہے پھر بھی

 

اگرچہ شہر سے رخصت ہوئی ہوائے اجل

پہ چھایا شہر پہ خوف و ہراس ہے پھر بھی

 

میں جانتا ہوں کہ وہ میرا ہو نہیں سکتا

پہ دل کا کیا کروں اس دل کو آس پے پھر بھی

 

وہ مجھ کو دیکھ کے پہچان کیوں نہیں پایا

وہ شخص یوں تو قیافہ شناس ہے پھر بھی

 

ترس رہی ہے مری زندگی خوشی کے لئے

 زبان _نوری پہ  حرف_ سپاس ہے پھر بھی

 

 

 

 

 

غزل9

تازہ غزل

 

منفرد لہجہ جدا طرز بیاں رکھتے ہیں ہم

شاعری کے واسطے اردو زباں رکھتے ہیں ہم

 

یاد جاناں میں گزرتے ہیں ہمارے روز و شب

اور کسی کی یاد اس دل میں کہاں رکھتے ہیں ہم

 

زینت محفل بڑھانے کے لئے اے جان جاں

تیری اک تصویر اپنے درمیاں رکھتے ہیں ہم 

 

توسن عمر رواں تھوڑا بہت آہستہ چل

ہر قدم پر  خواہشوں کا اک جہاں رکھتے ہیں ہم 

 

کیا ہوا لوگو اگر یہ جسم بوڑھا ہوگیا

جذبہء عشق و محبت تو جواں رکھتے ہیں ہم

 

پیش ظالم جرائت اظہار حق ہوتی نہیں

ظاہرا رکھنے کو بس منہ میں زباں رکھتے ہیں ہم

 

کون کہتا ہے ہمارے ہاتھ خالی ہو گئے

ماں کی صورت میں متاع دو جہاں رکھتے ہیں ہم

 

آسمان غم کا سورج ہم کو کیا جھلسائے گا 

تیری چادر کا جو سر پر سائباں رکھتے ہیں ہم

 

اس لئے بھی چومتے ہیں ماں کے قدموں کے نشاں

ماں کے قدموں کے تلے اپنی جناں رکھتے ہیں ہم

 

 

غزل 8

Anees Akhonzada:

غزل

 

 لے کے کوئی خبر نہیں آتا ۔۔۔۔۔۔۔۔

کیوں مرا نامہ بر نہیں آتا۔۔۔۔۔۔۔۔۔۔۔

 

چار لفظوں کو جوڑ دینے سے۔۔۔۔۔۔

 شاعری میں اثر نہیں آتا۔۔۔۔۔۔۔۔۔۔۔۔

 

جسکی جڑ  کھا گئے اگر کیڑے۔۔۔۔۔

اس شجر پر ثمر نہیں  آتا۔۔۔۔۔۔۔۔۔۔۔

 

مبتلا ہے جو خود پسندی میں۔۔۔۔۔۔

اس کو کوئی نظر نہیں آتا۔۔۔۔۔۔۔۔۔۔۔

 

مت کرو شاعری زبردستی۔۔۔۔۔۔۔۔۔۔۔۔

گر تجھے یہ ہنر نہیں آتا۔۔۔۔۔۔۔۔۔۔۔۔۔۔۔

 

تیر برساو سوچ کر لب سے۔۔۔۔۔۔۔۔۔۔۔۔

تیر یہ لوٹ کر نہیں آتا۔۔۔۔۔۔۔۔۔۔۔۔۔۔۔۔۔۔

 

صدقہ دے کر سفر پہ جانے سے

راستہ پر خطر  نہیں آتا۔۔۔۔۔۔۔۔۔۔۔۔۔۔۔۔۔

 

لوگ اٹھتے نہیں نشستوں سے۔۔۔۔۔۔۔۔

جب تلک اہل زر نہیں آتا۔۔۔۔۔۔۔۔۔۔۔۔۔۔۔۔

 

قاعدہ ہے عرب  لغت کا یہی۔۔۔۔۔۔۔۔۔۔۔

فعل پر حرف- جر نہیں آتا۔۔۔۔۔۔۔۔۔۔۔۔۔۔

 

زر پرستی کے اس زمانے میں۔۔۔۔۔۔۔۔۔۔

کوئی مفلس کے   گھر نہیں آتا۔۔۔۔۔۔۔۔

 

دل کی باتیں  کہوں تو کس سے کہوں

کوئی ہمدم نظر نہیں آتا۔۔۔۔۔۔۔۔۔۔۔۔۔۔۔۔۔

 

جا مسیحا کے پاس خود نوری

تیرے گھر  چارہ گر نہیں آتا۔۔۔۔۔۔۔۔۔۔۔۔۔

 

ابراہیم نوری