فخر شمال

خراج عقیدت

 

"فخر اہل شمال تھے حشمت"

 

آدم خوش خصال تھے حشمت

شاعر بے مثال تھے حشمت

 

نام:حشمت کمال الہامی

ذی حشم، ذی کمال تھے حشمت

 

ان کے چہرے کی مسکراہٹ سے

تھا عیاں،خوش بحال تھے حشمت

 

ان کے شعر و سخن سے آئی صدا

 نوری شیریں مقال تھے حشمت

 

صرف باشندہء شمال نہ تھے

فخر اہل شمال تھے حشمت

 

عشق آل_ نبی کی دولت سے

دھر میں مالا مال تھے حشمت

 

دی جنہوں نے اذان_مدح_ علی ع

ہاں وہ نوری بلال تھے حشمت

 

09360903756

محمد ابراہیم نوری قمی

 

منقبت غدیری

منقبت غدیری

 

تم غدیری ہو زمانے کو بتانا چاہئیے

زیب لب "من کنت مولا" کا قصیدہ چاہئیے

 

کون مومن ہے منافق پے پرکھنے کے لئے

برسر_ محفل علی کا ذکر کرنا چاہیے

 

نامہء اعمال کی مقبولیت کے واسطے

بس ولائے مرتضی کا اس پہ ٹھپہ چاہئیے

 

شہر علم مصطفی میں داخلہ کے واسطے

باب علم مصطفی کو کھٹکھٹانا چاہیے

 

یہ زبان حال سے کعبہ نے شق ہو کر کہا

لا مکاں مجھ کو مکیں عمراں کا بیٹا چاہئے

 

دار سے گونجا یہ اعلان _زبان_ میثمی

دل علی کو دو جناں میں گر ٹھکانہ چاہیئے

 

برسر خم یہ محمد سے احد نے کہہ دیا

دین کی تکمیل کا اعلان ہونا چاہیے

 

روز بعثت،ذوالعشیرہ،کربلا،روز غدیر

پڑھ انہیں گر دین احمدکا خلاصہ چاہئے

 

ہم کجا اور معرفت شیر الہی کی کجا

جب پئے عرفان_ قنبر اک زمانہ چاہیے

 

درس یہ بھی دے دیا آل_ محمد ص نے ہمیں

 رن میں ہنسنا اور سر محراب رونا چاہیے

 

اے ادیبو شاعرو رزق بلاغت کے لئے

ہاں تمہیں نہج بلاغہ دل سے پڑھنا چاہئے

 

کعبہ و مولود کعبہ کے عدو پر دوستو

کیوں گرا پتھر زمانے کو بتانا چاہئے

 

تم غدیری ہو تمہیں اسلام کے غدار سے

جتنا ممکن ہو سکے بس دور رہنا چاہیئے

 

مرتضی سے عشق کا اظہار ہی کافی نہیں

ان کے دشمن سے تبرا بھی ہمیشہ چاہئیے

 

مزرع_ قرطاس پر نوری قلم کی نوک سے

عشق آل مصطفی کا بیچ بونا چاہئیے

 

شاعر:محمد ابراہیم نوری

ملک:پاکستان

شہر:اسکردو

[phone]نمبر

خراج عقیدت

 

آن لائن طرحی مشاعرہ بیاد مرحوم حشمت کمال الہامی

11 اگست 2020 

 

 

اسی سے جانئیے کیا مرتبہ کمال کا ہے

کہ نام سب کے لبوں پر سجا کمال کا ہے

 

پڑی جو میری نظر آپ کے گھرانے پر

کھلا یہ راز کہ اک سلسلہ کمال کا ہے

 

ہماری قومی زباں ان پہ کیوں نہ ناز کرے

برائے اردو پسینہ بہا کمال کا ہے۔۔۔۔۔۔۔۔۔

 

ہمیشہ کرتے تھے ذکر_ کمال آل_ نبی ص

ہر ایک بزم میں اب تذکرہ کمال کا ہے

 

حیات اپنی گزاری ہے مسکراتے ہوئے

قلندرانہ قرینہ رہا کمال کا ہے

 

انہیں شہید کا رتبہ ملے تو کیا حیرت؟

علی ع سے عشق کا جو رابطہ کمال ہے۔۔۔۔۔

 

قدم قدم پہ ادیبوں کی تربیت کی ہے

یہ کارنامہ اسی شخص_با کمال کا ہے

 

پیام دے گئے حشمت یہ ماہ_ ذی الحج میں

رہ_خلیل و علی  راستہ کمال کا ہے۔۔۔۔۔

 

ہر ایک صنف_ سخن میں دکھا دیئے جوہر

ادیبو!دیکھ لو کیا حوصلہ کمال کا ہے۔۔۔۔

 

گواہی دیتے ہیں آثار_حضرت_ حشمت

کہ رشتہ علم سے گہرا رہا کمال کا ہے

 

زبان_نوری سے اشعار_فارسی سن کر

کیا جو ترجمہ،وہ ترجمہ کمال کا ہے۔۔۔۔۔(1)

 

(1): اسنو لینڈ ہوٹل میں گزشتہ سال ایک شعری نشست کے دوران مرحوم نے حقیر کے کچھ فارسی اشعار کا فی البدیہہ ترجمہ کیا تھا 

 

 

بیاد مرحوم حشمت کمال الہامی

کلام: محمد ابراہیم نوری قمی

11 اگست 2020

 

 

 

غدیر و مباہلہ

غدیر و مباہلہ

 

سمجھو ذرا کہ کیا ہیں غدیر و مباہلہ

اسلام کی بقا ہیں غدیر و مباہلہ

 

فکر_ پلید جس کو سمجھ ہی نہ پائے گی

وہ پاک فلسفہ ہیں غدیر و مباہلہ

 

جس سے منافقین کے چہرے  ہوں آشکار

دیکھو وہ آئینہ ہیں غدیر و مباہلہ

 

دوش ہوا پہ آج تلک ہے جو ضو فشاں

وہ دیپ، وہ دیا ہیں غدیر و مباہلہ۔۔۔۔۔۔

 

بعثت،عشیرہ،کربوبلا،ہجرت نبی ص

ہی کا تو سلسلہ ہیں غدیر و مباہلہ

 

جسمیں دخول اہل سقیفہ حرام ہے

وہ نوری دائرہ ہیں غدیر و مباہلہ

 

کلام:محمد ابراپیم نوری قمی

 

 

تو مرے پاس گر نہیں ہوتا

تازہ غزل 

 

تو مرے پاس گر نہیں ہوتا

تجھ کو کھونے کا ڈر نہیں ہوتا

 

عشق تو ایک بار ہوتا ہے

عشق بار دگر نہیں ہوتا

 

کیا سمجھتے وصال کی لذت؟

درد_ہجراں اگر نہیں ہوتا

 

ہم بھی جائیں ادھر خدا نہ کرے

ذکر تیرا جدھر نہیں ہوتا

 

جس پہ بھی اعتبار کرتا ہوں

بس وہی معتبر نہیں ہوتا

 

کس قدر کھوکھلا سا لگتا ہے

جس صدف میں گہر نہیں ہوتا

 

دو قدم ساتھ راہ چلنے سے

ہم قدم، ہمسفر نہیں ہوتا

 

ہاں اسے قتل گاہ کہتے ہیں

جس جگہ تن پہ سر نہیں ہوتا

 

میں سوالی ہوں ایک ہی در کا

اس لئے در بدر نہیں ہوتا

 

 فضل ولطف و کرم ہےسورج کا

ورنہ نوری قمر نہیں پوتا.۔۔