ابراہیم طالب سا شرف رکھتا ہوں

نعت

نعت گوئی سے شغف رکھتا  ہوں
ابوطالب  سا شرف رکھتا ہوں

وقت تحریر ثنائے احمد 
رخ مدینے کی طرف رکھتا ہوں 

گوہر نعت نبی پر ہے نظر
کب نگاہوں میں خذف رکھتا ہوں 

مقصد شاعری مدح آقا
یعنی پاکیزہ ہدف رکھتا ہوں 

حب سرکار دو عالم سے میں 
ضو فشاں دل کا صدف رکھتا ہوں 

یا نبی آپ کی خاطر دل میں
الفت شاہ نجف رکھتا ہوں ۔۔

محمد ابراہیم نوری۔۔۔۔۔

کربوبلائے زینب س

زینب ع

ہوگئی مجھ پہ سوا چشم عطائے زینب
 میرےہونٹوں پہ بھی جاری ہے ثنائے زینب

 

اس سے راضی ہے خدا جس سے بھی راضی بی بی
مرضیء رب کی ہے میزان رضائے زینب

 

 کربلا  کر بو بلا  تیری  بقا  کی  خاطر
ہاں ضروری تھی بہت کرب و بلائے زینب

 

 آج  بھی کربوبلا  سے  یہ صدا آتی ہے
دین  اسلام  ہے  ممنون  ردائے  زینب

 

بے  ردا  زینب  کبری  کو  خدارا  نہ کہو
کیا  نہیں  چادر  تطہیر  ردائے  زینب؟

 

شام و کوفہ کی فصیلوں نے گواہی دی ہے
ظلم پہ آج بھی حاکم ہے صدائے زینب
 
مصلحت تھی یہ خدا کی جو نہیں معصومہ
ورنہ دیکھی نہ سنی کوئی خطائے زینب؟

 

شکر و اخلاص و وفا،صبر و شجاعت،ہمت
کربلا میں تھے یہی نوری عصائے زینب

محمد ابراہیم نوری۔

 

منقبت فاطمہ زہرا(ابراہیم نوری قمی)

منقبت فاطمہ زہرا سلام اللہ علیہا 

 

اس لئے دینِ محمد سرخرو ہے فاطمہ

اس کی رگ رگ میں رواں تیرا لہو ہے فاطمہ 

 

زینب و شبیر و شبر کی قسم کی آج تک

گلستانِ دیں میں تجھ سے رنگ و بو ہے فاطمہ

 

فاطمہ معصومۂ قم کی ضریحِ ضو فشاں

سامنے ہے یعنی میرے روبرو ہے فاطمہ

 

محوِ حیرت ہیں کلیم اللہ کوہِ طور پر

گھر میں رہ کر رب سے محو گفتگو ہے فاطمہ

 

اللہ اللہ اے ابو طالب ترا عز و شرف

تو ہے بابائے علی تیری بہو ہے فاطمہ

 

عاص بن وائل کا ملتا ہی نہیں نام و نشاں

مصطفائی نسل کی وجہِ نمو ہے فاطمہ

 

اُسکی قسمت میں لکھی ہے لعنتِ پروردگار

جس کسی سے بھی ذرا ناراض تُو ہے فاطمہ

 

تجھ سے وابستہ ہے سو اس پر سمندر  ہے نثار 

میری آنکھوں سے رواں جو آب جو ہے فاطمہ

 

سر کے بل میں چل کے آیا ہوں تری دہلیز تک

مرضیٔ رب کی مجھے  بھی جستجو ہے فاطمہ

 

ہاں انہیں حق ہے سنیں قرآنِ مدحت آپ کا

بزم میں جن کی سماعت با وضو ہے فاطمہ

 

اپنی  صہبائے  مناقب سے ذرا چھلکا اسے 

خشک اور خالی مرے دل کا سبو ہے فاطمہ

 

ثانئ زہرا بنی ہے سو ہمیں حیرت نہیں 

مو بہ مو زینب عمل میں ہو بہو ہے فاطمہ

 

تیرے مہدیٔ کی زیارت کا شرف اس کو ملے

بس یہی نوری کے دل کی آرزو ہے فاطمہ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ابراہیم نوری 

20 جمادی الثانی 

22 دسمبر 2024

نوحہ ایام عزائے فاطمیہ (ابراہیم نوری قمی)

نوحہ حضرت فاطمہ زہرا سلام علیہا 

 

دیکھ لے خَلقِ خدا دیوار و در کے درمیاں 

کون ہے محوِ بُکا دیوار و در کے درمیاں 

 

دب گئیں ہیں فاطمہ دیوار و در کے درمیاں 

ٹوٹتا ہے آئینہ دیوار و در کے درمیاں 

 

اے بہن فضہ مرے ہاتھوں کو آکر تھام لے

گونجی زہرا کی صدا، دیوار و در کے درمیاں 

 

اُٹھ رہا ہے بیتِ خاتونِ قیامت سے دھواں

اک قیامت ہے بپا، دیوار و در کے درمیاں 

 

ظلم کے ہاتھوں رسن بستہ ید اللہ مرتضیٰ 

اور حجابِ کبریا، دیوار در کے درمیاں 

 

رو کے کہتے ہیں ملک اک دوسرے سے بار بار

بنتِ شاہِ دو سَرا، دیوار و در کے درمیاں 

 

مادرِ حسنین و زینب رو کے کہتی ہیں یہی

میرا محسن چل بسا، دیوار و در کے درمیاں 

 

محسن انسانیت کی جان ہے یہ جان کر

قتل، محسن کو کیا، دیوار و در کے درمیاں 

 

ہائے محسن کے لئے ہیں زخمی پہلو بھول کر  

فاطمہ نوحہ سرا، دیوار و در کے درمیاں

 

بَضْعَةٌ مِنِّی ہے نوحہ گر کہ ہے آتش بہ جاں 

نوری جانِ مصطفی دیوار و در کے درمیاں 

۔۔۔۔۔۔۔۔۔۔۔۔۔۔۔

ابراہیم نوری

نوحہ و سلام(ابراہیم نوریَ قمی)

سلام تازہ

 

زمانہ دیکھ لے یہ انقلاب نیزے پر

کوئی خطیب ہے محوِ خطاب  نیزے پر

 

فلک پہ شمس، قمر اور نجوم روتے رہے

زمیں پہ دیکھا جو اک آفتاب نیزے پر

 

 کہیں بلند کتابِ خدا سناں پر ہے

کہیں ہیں عالم علم الکتاب نیزے پر

 

یہ سوچ سوچ کے ہم آبدیدہ ہو رہے ہیں 

سکینہ خیمے میں ہیں مشک آب نیزے  پر

 

خدا کرے کہ یہ منظر انہیں دکھائی نہ دے

ہے رأسِ اصغرِ اُمِ رباب نیزے پر

 

بنا ہے جسمِ مطھر تو زینتِ مقتل

ہے سرخرو سرِ عزت مآب نیزے پر

 

خلیل نے جو مِنیٰ کی زمین پر دیکھا

ہے ان کے خواب کی تعبیرِ خواب نیزے پر

 

مہک رہی ہیں فضائیں انہیں کی خوشبو سے

ہیں سرخرو جو بہتر گلاب نیزے پر

 

نہیں فقط یہ نہیں ہے سرِ علی اکبرٔ

حبیبِ رب کا ہے نوریَ شباب نیزے پر

۔۔۔۔۔۔۔۔۔۔۔۔۔۔۔۔۔۔۔۔۔۔۔

ابراہیم نوریَ قمی

غزل

فی البدیہہ غزل

 

بازارِ محبت میں کھڑا سوچ رہا ہوں 

کیوں ملتی نہیں جنسِ وفا سوچ رہا ہوں

 

 جاری ہے مرے شہر بھی حبس کا موسم

 پھر کیسے بجھا جلتا دیا سوچ رہا ہوں

 

سوچا بھی نہیں تھا کہ وہ غداری کرے گا 

اس بات پہ اب صبح و مسا سوچ رہا ہوں

 

 وہ میرے لئے کار سزا سوچ رہے ہیں

میں جن کے لئے حرف دعا سوچ رہا ہوں

 

وہ میری خموشی سے پنپ لیتا اک دم 

 کہہ دیتا مجھ سے کہ میں کیا سوچ رہا ہوں

 

 رنگ آئے گا آورد کا اشعار میں میرے 

میں بہرِ غزل حد سے سوا سوچ رہا ہوں

 

کوئی بھی نہ تھا میرے سوا اسکا جہاں میں 

کیوں مجھ سے ہوا ہے وہ جدا سوچ رہا ہوں 

 

 میں کوئی سخنور کوئی شاعر تو نہیں ہوں

یہ حرفِ سخن کیسے لکھا سوچ رہا ہوں

 

یہ دل غم دنیا سے پھٹا  جاتا ہے پل ہل

جاؤں بہ سوئے کربوبلا سوچ رہا ہوں

 

آہٹ سی ترے پاؤں کی آنے لگی مجھ کو

نوری ترا نقشِ کفِ پا سوچ رہا ہوں

 

۔۔۔۔۔۔۔۔۔۔۔۔۔۔

ابراہیم نوریٓ

نعت ام الکتاب ہے

ہونٹوں پہ میرے نعت رسالت مآب ہے
آفاق  لب پہ جلوہ نما آفتاب ہے

ماہ ربیع اولی کا مہتاب دیکھ کر
دل باغ باغ خلق کا چہرہ  گلاب ہے

یہ سوچ کر شریک ہوا بزم نعت میں
فرد عمل میں ثبت حضور و  غیاب ہے

خواب مدینہ اس لیے بھی دیکھتا ہوں میں
یہ خواب دیکھنے کا بھی بے حد ثواب ہے

رخ پر ملی رسول کی نورانی گرد پا
شمس و قمر کے رخ پہ جبھی آب و تاب ہے

جو جس قدر جھکا  نبی کی جناب میں
وہ اس قدر جہان میں  عالیجناب ہے

اے شہر علم تیرے الہی وجود سے
ہم کو متاع بارہ دری دستیاب ہے

سورج سے عشق اسکی شعاعوں سے
تیرا نظام فکر و عقیدہ خراب ہے

نوری کتاب عشق ہیں سبطین مصطفیٰ
ام ابیھا فاطمہ ام الکتاب ہے